O SISTEMA DE OPOSICIÓNS E A PROGRAMACIÓN DIDÁCTICA (DOSIER TEMA 6)

Ola a todos e todas!

Nesta nova entrada do blog falaremos acerca da cuarta sesión da parte da materia Linguas estranxeiras no contexto nacional e internacional impartida por Gonzalo Constenla Bergueiro.

Esta sesión si merece unha entrada de diario diferenciada, pois foi adicada ás programacións didácticas vixentes e aos sistemas de oposición.

A primera parte da clase foi puramente maxistral. Nela, o docente explicounos de forma pormenorizada as principais características do sistema de oposición vixente na actualidade para o profesorado de linguas estranxeiras, tanto a nivel de ensino secundario como de Escola Oficial de Idiomas. Foi unha sesión moi interesante, especialmente porque este tipo de cuestións teñen moita importancia para nós, como futuro profesorado de linguas estranxeiras. Moitos de nós traballaremos na educación pública, xa sexa dentro do ensino de idiomas, na Educación Secundaria Obrigatoria ou na Formación Profesional. Porén, ata hoxe, esta foi a única asignatura na que falamos de forma pormenorizada dos sistemas de acceso a esta función pública, dos exames de oposición que moitos de nós deberemos pasar nun futuro e en todos os pasos que deben ser tomados para achegarnos a esta posición de docente.

Foi unha clase que agradecín profundamente, xa que tamén houbo tempo para falar das nosas dúbidas e inquietudes ao respecto. Tras esta sesión comprendemos moito mellor todos os procesos polos que, probablemente, moitos de nós pasaremos nun futuro.

Esta non foi a totalidade da sesión. Unha vez rematada esta parte máis maxistral e de ter resoltas todas as nosas dúbidas con respecto ao tema, pasamos a tratar o seguinte puto da sesión: a programación didáctica.

Neste mesmo Máster xa contamos cunha asignatura centrada no deseño curricular. Porén, as programacións didácticas que traballamos nesa asignatura eran moito máis pormenorizadas. A explicación destas unidades didácticas foi máis orientada a aquelas que teremos que presentar na oposición, polo que foi unha sesión moi enriquecedora.

Tamén puidemos ter unha parte máis práctica, xa que, orientado a unha futura entrega dunha unidade didáctica individual, tivemos que construir, por grupos, diferentes seccións dunha programación completa.

O meu grupo centrouse na concreción de elementos transversais. Falamos das súas características e de cada un destes elementos de forma individualizada. A continuación, transcribo o noso traballo sobre estes elementos, como peche final desta entrada. Na próxima centrareime neste mesmo tema pero orientándoo ao caso das programacións e sistemas de oposición existentes para a lingua xaponesa, temática principal deste blog.

Traballo realizado na aula

CONCRECIÓN DE ELEMENTOS TRANSVERSAIS 

Elementos transversais e modos de aplicación e relación coas unidades didácticas

ET.1: Comprensión lectora: A comprensión lectora traballarase en todas as unidades didácticas, pois é un elemento chave e un obxectivo no currículo de lingua estranxeira para a adquisición da lingua por parte do alumnado. 

ET.2: Expresión oral e escrita: Do mesmo xeito que o anterior elemento, a expresión oral e escrita é tamén un dos obxectivos principais da adquisición da lingua estranxeira. Entón, traballarase de xeito xeral ao longo do curso en todas as unidades didácticas.

ET.3: Comunicación audiovisual: A comunicación audiovisual traballarase de xeito xeral ao longo do curso mediante o uso das TICs nas distintas situacións de aprendizaxe. A súa aplicación será de xeito específico comunicativo, mentres que a competencia máis xeral traballarase co seguinte elemento transversal.

ET.4: Competencia dixital: Do mesmo xeito que o anterior elemento, a competencia dixital traballarase co uso das TICs nas distintas situacións de aprendizaxe, cun enfoque mais xeral, utilizando ferramentas de diversas formas, non limitándose unicamente a ferramentas comunicativas.

ET.5: Educación emocional e valores: O alumnado debe adquirir determinadas actitudes e desenvolver determinados comportamentos baseados en valores que lle sirvan tanto para o seu propio desenvolvemento na súa vida diaria, como tamén para o seu desenvolvemento na vida social con outras persoas.

ET.6: Igualdade de xénero: A igualdade de xénero é unha cuestión que a sociedade reclama constantemente, e polo tanto debe incorporarse á acción educativa e traballarase no propio ensino formal do alumnado para garantir un desenvolvemento eficaz na súa vida persoal, social e política en cuestiones de xénero na súa vida diaria.

ET.7: Creatividade:  É moi importante promover a creatividade do alumnado dende a consellería e debe ser un elemento a traballar en todas as materias.

ET.8: Educación para a saúde: O alumnado debe preocuparse polo coñecemento da súa saúde e o profesorado de todas as materias debe impulsar o seu coidado e influir nas súas competencias e aptitudes.

ET.9: Respecto mutuo e cooperación entre iguais: En todas as materias o profesorado deberá garantir o respecto entre todo o alumnado, así como a súa cooperación nas tareas dentro e fora da aula.

ET.10: Educación para a sustentabilidade e consumo responsable: Todas as materias deberán promover o respecto e coidado das persoas, da diversidade, do medio ambiente e dos recursos do planeta.

ET.11: Emprendemento social e empresarial: Débese traballar polo espírito emprendedor do alumnado, motivándoos e ofrecendo oportunidades en todas as materias para traballar o emprendemento. 

ET.12: Fomento de espírito crítico e científico: O profesorado das diferentes materias debe promover o espírito crítico e científico, ademais dunha actitude positiva e fomento da imparcialidade e curiosidade. 

 

Características dos elementos transversais

O seu carácter transversal: É dicir, non aparecen asociados a unha soa área senón que se integran e asocian a todas e cada unha das áreas que forman o currículo. 

Importancia social: As cuestións que se integran dentro deles teñen unha importante significación social. Todas as cuestións ambientais, así como as relacionadas coa saúde, a paz, a solidariedade… está sendo constantemente reclamadas pola sociedade para que sexan incorporadas á acción educativa, sendo ésta un dos eixes más importantes da formación dol alumnado. 

Valores sociais: O alumnado sobre todo debe de chegar a adquirir unhas determinadas actitudes, e a desenvolver determinados comportamentos baseados en valores libremente asumidos.